الحب رباط قوى يجمع بين قلوب تآلفت وانصهرت فى بوتقه عطاء

الحب رباط قوى يجمع بين قلوب تآلفت وانصهرت فى بوتقه عطاء واحده تتنفس الإلفة والمودة .. فى اعماقها الوجد حاديه الشوق يسافر من الوريد إلى الوريد ... فبكل جمال المعانى إلتقيا وسافر الحبيب ليؤمن استمرارية العلاقة بختام يليق وما يحملانه من مشاعر كلٌ تجاه الآخر .. طالت سنين الغربة إلى ست سنوات ... صبرت خلالهما المحبوبة على آمل أن تسعدهما الأيام القادمات تحت سقف واحد ... لكن للقدر رسمه الخاص فكانت الفاجعه بأن يعود الحبيب ويتزوج بغيرها فأحال أيامها إلى سواد ودموع لا تجف .. علاءالدين ابوسير هذا الرائع الذى اغدق آلاف السودانيين بفيض كلماته الجميله التى تدخل القلب دون إستئذان وتفعل ما تفعل بالمشاعر هو رسول الشوق فى رائعته ( حبى أنا ليك كان زادى )

حـبـى أنــا لـيــك كـان زادى وكـان جوه الحنايا دفين
كـتّ بـضـــارى مـن الـنـاس وخايفه عليهو من العين
عـلـيــهــــو كــت بصــوم وافطر عليهو بكابد النارين
كـــت بـحــســب سنـيـن الغربة لما تعود تجينى متين
وكـــت بــــرجــاك فــوق الـنــار لما وكت لقانا يحين
نونس فــى بـراءة أطفال وفى الحب نروى ننهل زين
وكـلــمــا يــوم يـــزيـــد البـيــنا لـمـا بقينا قاب قوسين
اتارى أنا كت فيك مخـــدوعه وكم من زي مخدوعين
مــا قــايــلاك حـبــيـــب آلاف وقـلـبـــك قبله للضالين
ومــا قــايــلاك بتـنسي حبيب صبر راجيك سته سنين
وســاهـــر كـم لــيـــالــى طــوال يـتقلب شمال ويمين
كـيــفــن يـهــون عـليك تنساهو زولاً كان عليك حنين
وتـشــغــل بــالـك الأشــواق لــمــّن تـزبــــل الياسمين
كــت دايــراك بـسـمة عريضة فى وجه الزمان الشين
وكــت دايــراك سـاعة الحاجة تبقى ليّ دخرى خزين
كــت دايــراك مـقــنــع حـوبــه وكتين المضارى يبين
وكــت دايــراك فـارس احـلامى تـشاركنى ونتم الدين
وكــت دايــراك أمــل بـســام يــزيــل ألم البعاد والبين
كــت دايـــراك شـريـك الروح واخدمك حافية القدمين
وكــت بـحــلــم بك انت معاي مجرتق بالعديل والزين
جنـبـك فـى يــمــيـنــك قــاعــده نـسمع فى دقر يا عين
تـبــشـــر زيــن مــع الأصحــاب وتتشـبـل من الوزين
أنا الأبـحــرت راكــبه الموج اكيد مرسايا بين موجتين
وداعــاً يـا زمـن ظــالـــــم وبــالأفــــراح عـليّ ضنين
وداعــاً يـا قـــلــب قـــاســـي لا بـيــحـــــــن ولا بيلين
وداعــاً يـا ســراب خــداع محال ما بيروي عطشانين
وداعــاً يـا كــلام معـســول حــدو ومكـمـنـــو الشفتين
وداعــاً يـا سحـابـة صيــف شايلى مطر ضليلا رهين
تبـشــر بـى خـريف جايـيـنا ياما الناس رجوهو سنين
كل زولاً يـفـكــر فـيــهــا مـا مـعـــروفـة تـنــزل وين
وألف سلام عليك يا قلبي المـسـالم وديمه طبعو حنين
يتـاورو الـشــوق ويلعـب بيـهو تنحر فى حشا السكين
تـعــاودو الـذكــري تــنــتـر جوا حالو يحنن المسكين
أخــيــراً مــى لـيــك سلام وقبل ما تجف دموع العين
وقـبــال مـنــى مــا تـعـــدى وقــبــال الفـراق ما يحين
بخيت وسعيد عليك إن شاءالله يـبـقالـك عـمــار وبنين
وقـلـبى أنـــا خـلــى فـى أنـاتو بـعـدك ياما راجى أنين
ولو كــان يــا قـلــب حـبـيـت بـعـدو بعـد قسمت يمين
مـا يـنــتـــمّ لــيــك مــراد لا تضـوق لا حلو ولا زين
وتفضل طول حياتك تبكى طول عمرك تعيشو حزين
وعـمـرك مــا تجـيـك سـعــادة مـا تـتـهـنــا قـول آمين
وتـــانـى الحـب عليك حرمان ووعد الحر أمانه ودين
كانت تحسب الايام لرجعته من الغربة وعندما عاد حمل لها العوازل بعض الأقاويل بأنه ينوى الزواج بغيرها وقبل أن تتأكد ثارت لكرامتها فخرجت منها بعض الكلمات الجارحة دون أن تتأكد من حقيقة الأمر أو الحديث لصاحب الشأن .. فكان ردة لها....... قصيدة ( كان أملى )
حى أنا ليها كان أملي وأمانى حياتى فى الدارين
إلا ظـنونا والـعـزال محـو الحـلم الرعيتو سنين
شلت هـواهـو فى الأعـماق وفى قلبى العليها أمين
وفى أحلام ليالى الـغـربة وفى أنات غريب وحزين
وفى فجر الصبـاح الـباكى فـى أهـات يتيم مسكين
وفى أنفاس عـميرى الباقى فى قيم الضمير والدين
واسـترجـع مـعاها الذكرى واشكيلا الفراق والبين
وأحـدثا عـن مآسى الغربة واشواق الفؤاد والعين
واصنـاف العـذاب الـشـايفو والنار البقت نارين
وما كان حبى ليها خداع ولى غيرا الحنان واللين
وأبدا مـا عـشـقت خـلافا وما قلبى البشيل إتنين
ولا ســويــت مـشــاعرى شواطى للتايه من الوزين
ولا شـيدت للـريـد قـبـله بـيهـا ألملم الضالين
وحات البينا كـان عـامــر وحات الجوه لسه دفين
ما حـبـيـت مـعاهـا إنـسـان ولا جـبـت نوم شقين
ومـديـت صبــري فـى الأيام بدل واحد بقن صبرين
ده كلو عـشان أتم مـشوارى وارجع للعديل والزين
وزى ماكـان تـعـد أيـامـا تسـأل عن رجوعى متين
وتحلم بـالـعديل والـحـنه والعش البفوح ياسمين
وتبسم لى خـيال أحـلامــا بى قـلباً ملايـكى حنين
وتـرقــص بالـفـرح تـتـني تـتـمايل شمال ويمين
عليها أنا كان يطير قـلـبى زى عصـفور بلا جنحين
ويـنـزل فـى ديـارا يـغـنى يـتـمنى ويقول آمين
ويمسح من عيونا الدمعه مـن جـوفا وقـليبا أنين
وحتى الروح تسافـر ليـهــا والإحساس رفيق ومعين
شن فضل معاى فى الغربة غير جسدى وسهد العين
يساهرو مع الحبيبه النايمه والعهد الوثاقو متين
ويحلموا بالطبول والزفه والعقد اليباركوا الدين
ويعـملـو لـى تلاقى ارواحنا والفرح البزيل حزنين
ولـمـا وصـلـت قـبـل سـلامى كان الناس بتسأل وين
واتلـمّ الـشــتات فـى دارنا من كل الـقبايل هين
وابتدت الخلوق تـتـبـاري زى الـعادة فى التخمين
أريتـم عرفوا حالى البى واريتم كانوا بس عارفين
إنو هواها روح لى روحى وإنو قـلـوبـنا متعاهدين
وإنى أنـا ما بسـيـب إنسانة شالت ريدي سته سنين
وما بنـسـي البسيـمه الحلوه والسمح الكلامو رصين
والـذكـرى الصـداها بحـسـو فى أعماقى ليهو رنين
الا الـعادة مـا بتـتخلى لـلناس الـدوام فـارغين
لـفـوا الحلى بى أركـانا جـاطـوهـا وملوها طنين
قـالـو تحـت أخـتـرت حـلـوة مـن أجـمـل الحلوين
ليه صـدقـتى يا مـسـكـينه ناساً كان متين صادقين
واسـتعجلتى مـا أتـأكـدتى مـرقتى الكــلام الشين
وقلتى العود خلاص إنشـق والطـق سمعتـو الأضنين
وإنى أنا ما بسـاوى تـرابك السارت علي الكـرعين
وإنى من رموز الكـانوا دايـماً للـعهـود خـاينين
وخـميتي الـرمـاد وبـكـيتى وسيلتى الدموع نهرين
بدل ما تـمد أياديـك زهـرة شـربت من نزيف قلبين
وكـبـرت فـى رعــايـة الـريـدة طـالت طلعت فرعين
بـدل مـا تـقـولى سـلامـه لومـا قـلــتـى مشتاقين
أرهـفـتـى الـســمـع صـدقـتى للناس البجوك واشين
وصــاحـبتي الـبجـوك يـتسـلو ما فكرتى ليه جايين
ورسـلـتى الـعـزول بـرسـالـة حـادة واحد من سكين
وقلـتى خـلاص نهـيـتى البينا قلتى وقلتى لى آسفين
سـفـاينك ما بتلم فى ساحلى والشاطى الهجرتو سنين
وفـى لـحـظـة غـضب إخترتى فى لحظة عذاب وأنين
والـدرب الـصـبــرت عـشـانو فى آخرو اتفرق دربين
ما إنـتى الـبراك ابـحـرتى عـز الهيجة بين موجتين
وحاتك لى قلب مجـروح ومـحـروم من مُنى العاشقين
جـمال الدنيا يـا مغروره إلـفه وريـدة بين إتنين
تعالى نعـيـد سنيا الـضـايعه نرجع للعديل والزين
وأحسن ننسى كل الـفـات قـبـل ما يفوت عمرنا حزين
ومهما يقسى قلبـك إنـتـى ويـفـضـل فى عنادو سجين
بكره مصيرو لى يعـود ويرجـع تـانى لىّ يـلـين
لأنو الريده جمرة نار يعـيـش فى الجوف رمادا سنين